རིག་སྟོང་བཙན་ས་ཟ...

རིག་སྟོང་བཙན་ས་ཟིན་པའི་རང་གདངས་ཞེས་བྱ་བ་བཞུགས།
འཁོར་འདས་མཉམ་པར་བརྡལ་བའི་གཞི་ཀློང་དུ། །
རང་སྣང་སྐུ་གསུམ་རོལ་པ་འབྱམས་སུ་ཀླས། །
འཇི༵གས་མེ༵ད་གཟུངས་སྤོབས་ཏིང་འཛིན་སྒོ་བརྒྱ་འབྱེད། །
དོ༷ན་གཉི༷ས་ལྷུ༷ན་གྲུ༷བ་རྡོ༷་རྗེ༷་བདུ༷ད་འཇོ༷མས་ང་། །
རྣམ་དག་ཚུལ་ཁྲིམས་གཙང་མས་རྒྱུད་བསྡམས་ཤིང་། །
གཞན་ཕན་བྱང་ཆུབ་སེམས་ལ་མངའ་དབང་འབྱོར། །
རྡོ་རྗེ་ལྟ་བུའི་ཏིང་འཛིན་འཕྲུལ་འཁོར་གྱིས། །
ཉེ༷ས་ཚོ༷གས་ར༷ང་སར་གྲོ༷ལ་བ་ང་མིན་སུ། །
ནམ་མཁའ་མཛོད་ཀྱི་ཏིང་འཛིན་ཕོ་ཉ་ཡིས། །
ཕུ༵ན་ཚོ༵གས་སྡེ་བཞིའི་ཁྲི་ལ་མངའ་གསོལ་ཞིང་། །
འབྲེལ་ཚད་དོན་ལྡན་ཡིད་བཞིན་ནོར་བུ་དངོས། །
འདོ༷ད་རྒུ༷་ཀུན༷་གྱི་འབྱུ༷ང་གནས་ང་མིན་སུ། །
སྒྱུ་མ་ལྟ་བུའི་ཏིང་འཛིན་དང་འགྲོགས་པའི། །
ཐབས་གྲོལ་ཨུཏྤལ་དམར་པོའི་ཞགས་པ་ཡིས། །
རླུང་སེམས་ལྷ་མིའི་འདུ་བ་བྲན་དུ་ཁོལ། །
སྣང༷་སེ༷མས་དབ༷ང་སྡུ༷ད་སྐལ༵་བ་བཟ༵ང་པོ་ང་། །
དཔའ་བར་འགྲོ་བའི་ཏིང་འཛིན་གྱིས་བོས་པའི། །
ཤེས་རབ་རལ་གྲིའི་འཕྲུལ་ཐབས་གཅིག་གིས་ཀྱང་། །
ཚར་གཅོད་རྗེས་སུ་འཛིན་ལ་དབང་འབྱོར་པའི། །
ཕྱོ༷གས་ལ༷ས་རྣ༷མ་པར་རྒྱ༷ལ་བ་ང་མིན་སུ། །
སྡག༷ས་སྐྱེས༷་ཌཱཀིའི་རྟེན་འབྲེལ་ལ་བརྟེན་ནས། །
ཞི༷ང་སྐྱེ༷ས་ཌཱཀིའི་ཚོགས་ལ་མངའ་དབང་བསྒྱུར། །
ལྷ༷ན་སྐྱེ༷ས་ཌཱཀིའི་དེ་ཉིད་མངོན་སུམ་མཐོང་། །
མཁའ་འགྲོའི་དབང་ཕྱུག་ཧེ་རུ་ཀ་དཔལ་ང་། །
ཤིན་ཏུ་བསམ་སྦྱོར་ངན་པའི་བདུད་རིགས་ཚོགས། །
བསྟན་དང་འགྲོ་ལ་གནོད་པ་དེས་ཆོག་གིས། །
ད་ནི་རང་མགོ་རང་གིས་མ་སྐོར་བར། །
ངན་སོང་ལམ་ནས་བཤོལ་ན་མི་ལེགས་སམ། །
ཐུགས་རྗེའི་སྤྱན་ལྡན་རྩ་གསུམ་སྲུང་མའི་ཚོགས། །
ཕ་བཟང་བུ་ཡི་གྲོགས་སུ་ད་བྱོན་ལ། །
བར་ཆད་བདུད་ཀྱི་གཡུལ་ལས་རྒྱལ་བ་དང་། །
མཐུན་རྐྱེན་ལེགས་ཚོགས་ཆར་དུ་འབེབས་པར་མཛོད། །
ཅེས་ས་སྦྲུལ་ཟླ་པའི་ཚེས་ཀྱི་སྡ་དྲོའི་ཆར་སྒྲུབ་བརྩོན་གྱི་སློབ་མ་རྣམས་ལ་ལྷུན་གྲུབ་ཐོད་རྒལ་གྱི་རིག་པ་ངོ་སྤྲོད་པའི་ཉེར་བསྡོགས་ཀྱི་ཚེ། གློ་བུར་དུ་བར་ཆད་བདུད་ཀྱིས་གླགས་བཙལ་བའི་ཆོ་འཕྲུལ་བསྟན་པའི་རྐྱེན་གྱིས་འབར་བ་ཆེན་པོའི་སྐུར་བཞེངས་ཏེ། ཐུགས་ཁྲོས་པའི་ཚུལ་གྱིས་ཐོལ་བྱུང་དུ་སྤེལ་བ་གུས་སློབ་བསྟན་འཛིན་རྒྱ་མཚོས་སྒྲ་ཕབ་འཁོར་ལོ་ལས་སླར་ཡི་གེར་བཀོད་པ་དགེ།། །།