རྒྱལ་དབང་མཆོག་ནས...

རྒྱལ་དབང་མཆོག་ནས་གསར་དུ་ལྗགས་རྩོམ་གནང་བའི་ལྷ་མོ་འོད་ཟེར་ཅན་མའི་བསྟོད་པ།
Praises of Marichi: New Verses by His Holiness the Gyalwang Karmapa

བཅོམ་ལྡན་འདས་མ་འོད་ཟེར་ཅན་མ་ལ་བསྟོད་པ་མུ་ཏིག་ཕྲེང་མཛེས་ཞེས་བྱ་བ་བཞུགས་སོ། །

རྒྱལ་ཀུན་ཡེ་ཤེས་བཻཌཱུར་དག་པའི་ངོས། །
སྣང་མཛད་སྒྱུ་འཕྲུལ་དྲྭ་བའི་གཟུགས་བརྙན་ནི། །
མཚར་སྡུག་ལྷ་མོའི་དཔལ་དུ་ཤར་བའི་སྐུ། །
བཅོམ་ལྡན་འོད་ཟེར་ཅན་མར་བསྟོད་པར་བགྱི། །

༡ གང་ལ་བརྟེན་ན་མི་དང་མི་མིན་དང་། །
ས་སོགས་འབྱུང་བའི་འཇིགས་པ་མ་ལུས་པ། །
ཀུན་ནས་ཞི་མཛད་སྐྱབས་ཀྱི་མཆོག་གྱུར་གང་། །
བདག་ལ་དར་ཅིག་དགོངས་པར་མཛད་དུ་གསོལ།

༢ དད་པའི་སྤུ་ལོང་ཤིན་ཏུ་གཡོས་པ་ཡི། །
ལག་ཟུང་མེ་ཏོག་གཞོན་ནུ་ཁ་འབུས་ལྟར། །
བདེ་ཆེན་འཁོར་ལོའི་རྒྱན་དུ་རབ་བཞག་ནས། །
ཁྱོད་ལ་བསྟོད་པ་ཁོ་ན་ལྷུར་དུ་ལེན། །

༣ འབུམ་ཕྲག་ཟླ་བའི་ཕུང་པོ་བརྩེགས་པ་ལས། །
རབ་མཛེས་ཡིད་ཀྱིས་བྲིས་འདྲའི་མཆོད་སྡོང་རྩེར། །
བུམ་བཟང་མཆོག་ཏུ་རྒྱས་པའི་ལྟོ་བ་ན། །
པད་དཀར་ཟླ་བ་རྒྱས་པའི་གདན་སྟེང་དུ། །

༤ འཛམ་བུ་ཆུ་བོའི་གསེར་ལྟར་དྭངས་བའི་སྐུ། །
ཉི་མ་བྱེ་བས་འཁྱུད་པའི་ལྷུན་པོ་བཞིན། །
གཟི་བྱིན་མཚུངས་པ་མེད་པའི་ལྷ་མོ་ཡིས། །
བདག་ལ་དེ་རིང་ཞལ་བཟང་བསྟན་དུ་གསོལ། །

༥ བཙོ་མའི་གསེར་དང་ཆུ་ཤེལ་དབང་སྔོན་ལྟར། །
དྲི་མེད་ཤིན་ཏུ་དག་པའི་ཞལ་གསུམ་ནི། །
ཞི་དང་ཁྲོ་སོགས་གར་དགུའི་ཉམས་ལྡན་པས། །
གཞན་སེམས་བྲན་དུ་འགུག་ལ་ཕྱག་འཚལ་ལོ། །

༦ གནག་སྣུམ་རལ་པའི་གཙུག་ཏོར་རྒྱས་པའི་རྩེར། །
བྱང་ཆུབ་མཆོག་གི་མཆོད་སྡོང་རབ་མཛེས་པ། །
ས་འཛིན་རྩེ་མོར་འཁྲིགས་པའི་སྤྲིན་བཟང་ལྟར། །
དལ་གྱིས་གཡོ་བ་ཁྱོད་ལ་ཕྱག་འཚལ་ལོ། །

༧ འཆི་མེད་བུ་མོ་སྐྱེངས་པའི་མཛེས་སྡུག་སྐུར། །
འཇམ་མཉེན་སྲབ་པའི་དར་གྱིས་ལེགས་དཀྲིས་ཤིང་། །
རྒྱུ་སྐར་ཕྲེང་བ་སྲད་བུར་བརྒྱུས་འདྲ་བའི། །
སྣ་ཚོགས་རྒྱན་གྱིས་བརྒྱན་ལ་ཕྱག་འཚལ་ལོ། །

༨ འཁྲིལ་ཆགས་གཞོན་ཤ་རྒྱས་པའི་ཕྱག་དྲུག་གིས། །
མདའ་དང་རྡོ་རྗེ་ཁབ་དང་གཞུ་སྐུད་དང་། །
མྱ་ངན་མེད་པའི་ཡལ་ག་འབྲས་བུར་བཅས། །
ཀུན་ཏུ་འཛིན་མ་ཁྱོད་ལ་ཕྱག་འཚལ་ལོ། །

༩ ས་དང་ལྷུན་པོ་གཡོ་བའི་རྩལ་ལྡན་ཞིང་། །
ཉི་ཟླའི་བགྲོད་པའང་ཐུང་ངུར་བྱེད་པ་ཡི། །
རྫུ་འཕྲུལ་ཤུགས་འཆང་ཕག་རྒོད་སེར་པོའི་སྟེང་། །
བརྗིད་ཅིང་འགྱིང་བ་ཁྱོད་ལ་ཕྱག་འཚལ་ལོ། །

༡༠ གཞོམ་མེད་ནཱ་དའི་སྒྲ་ལས་འཕོས་པ་ཡི། །
ཚངས་ཆེན་དབྱངས་ཀྱི་རྒྱུད་མང་་འཁྲོལ་བའི་གླུ། །
སྐལ་བཟང་རྣ་བའི་དགའ་སྟོན་གཅིག་པུ་ཉིད། །
སྲིད་པའི་མཐར་ཡང་སྒྲོགས་ལ་ཕྱག་འཚལ་ལོ། །

༡༡ དོན་དམ་ཅིར་ཡང་དམིགས་པ་མེད་པའི་ངང་། །
སྣང་ཚུལ་འགག་པ་མེད་པའི་རོལ་རྩེད་ཀྱིས། །
འགྲོ་ལ་མཆོག་གི་དངོས་གྲུབ་སྟེར་མཛད་མ། །
བདེན་གཉིས་ཟུང་འཇུག་ཁྱོད་ལ་ཕྱག་འཚལ་ལོ། །

༡༢ ཚད་མེད་ཡེ་ཤེས་ཆོས་སྐུའི་སྣང་བ་ཡིས། །
རབ་འབྱམས་ཆོས་ཀྱི་དབྱིངས་ཀུན་རྒྱས་བཀང་བས། །
མཐའ་དག་ཤེས་བྱའི་གོ་སྐབས་རབ་འཕྲོག་པ། །
རྣམ་མཁྱེན་ལྷ་མོ་ཁྱོད་ལ་ཕྱག་འཚལ་ལོ། །

༡༣ བརྩེ་ཆེན་ཐུགས་རྗེའི་སྣང་བ་རབ་རྒྱས་པའི། །
བདེ་ཆེན་ཡེ་ཤེས་ཞུན་མའི་མེ་ལྕེ་ཡིས། །
ཉོན་མོངས་བདུད་དཔུང་མ་ལུས་སྲེག་མཛད་པ། །
བཅོམ་ལྡན་འདས་མ་ཁྱོད་ལ་ཕྱག་འཚལ་ལོ། །

༡༤ ཁྱོད་ཀྱི་མཚན་ཙམ་ཡིད་ལ་བྱེད་པས་ཀྱང་། །
འཇིགས་དང་སྡུག་བསྔལ་ཀུན་ལས་བྲལ་འགྱུར་ན། །
སྐྱབས་སུ་སོང་ཞིང་བཟླས་བརྗོད་བརྩོན་པ་ལ། །
ཐུགས་རྗེའི་འཇུག་པ་ལྷོད་པ་ཅང་སྲིད་དམ། །

༡༥ དེ་ཕྱིར་མ་ཡིས་བོར་བའི་བུ་སྡུག་བཞིན། །
གནས་སྐབས་ཀུན་ཏུ་ཉེར་འཚེས་མནར་བ་ལ། །
བྱམས་པའི་སྤྱན་གྱིས་ཡུད་ཙམ་མ་གཟིགས་ན། །
ཐུགས་རྗེའི་གཏེར་ཞེས་རྫུན་དུ་མི་འགྱུར་རམ། །

༡༦ རླབས་ཆེན་ཡོན་ཏན་རྒྱ་མཚོའི་ཟེགས་མ་ཙམ། །
མངོན་པར་བསྟོད་ལས་བྱུང་བའི་དགེ་བ་དེས། །
འགྲོ་ཀུན་ཁྱོད་ཀྱི་གོ་འཕང་རབ་བརྙེས་ནས། །
བདེ་བ་མཆོག་གི་ས་ལ་རེག་གྱུར་ཅིག །

༡༧ དཀར་མིན་ལས་ཀྱི་བག་ཆགས་འཐུག་པོའི་འབྲས། །
ཡོངས་སུ་སྨིན་པའི་རིམས་ནད་དྲག་པོ་ཀུན། །
ཡངས་པའི་ས་འདིར་མིང་ཙམ་མེད་པ་ཡི། །
རྫོགས་ལྡན་དུས་སྟོན་མྱུར་དུ་ཚེས་གྱུར་ཅིག །

༡༨ མཚོན་དང་མུ་གེ་འབྱུང་བའི་འཇིགས་པ་དང་། །
སྡང་བའི་དགྲ་དང་འབྱུང་པོས་འཚེ་བ་དང་། །
སྡིག་པའི་རྨི་ལམ་མཚན་མ་ངན་པ་སོགས། །
ཐམས་ཅད་ཁྱོད་ཀྱིས་རབ་ཏུ་ཟློག་པར་མཛོད། །

༡༩ ནད་མེད་ཚེ་དང་རླབས་ཆེན་རྣམ་དཔྱོད་དང་། །
དགེ་ཚོགས་ཀུན་གྱི་རྩ་བ་དད་སེམས་ཏེ། །
འཇིག་རྟེན་འཇིག་རྟེན་འདས་པའི་ཡོན་ཏན་རྣམས། །
ཡར་ངོའི་ཟླ་ལྟར་འཕེལ་ཞིང་རྒྱས་པར་ཤོག །

༢༠ ཐུབ་པའི་བསྟན་པ་སྤྱི་དང་བྱེ་བྲག་རྣམས། །
མི་ཉམས་གོང་དུ་སྤེལ་བའི་བསམ་སྦྱོར་ལ། །
བར་དུ་གཅོད་པའི་བདུད་རིགས་ཐམས་ཅད་ཀྱང་། །
ཚར་གཅོད་རྗེས་སུ་འཛིན་པའི་མཐུ་ཐོབ་ཤོག །

༢༡ བདག་ནི་མཐོང་ཐོས་རེག་པ་ཙམ་གྱིས་ཀྱང་། །
འགྲོ་བའི་ཡིད་ཀྱི་གདུང་བ་སེལ་བ་དང་། །
ཡིད་བཞིན་ནོར་དང་བུམ་པ་བཟང་པོ་ལྟར། །
འདོད་པའི་རེ་བ་ཡོངས་སུ་སྐོང་བར་ཤོག །

༢༢ འདི་ནས་སྐྱེ་བའི་ཕྲེང་བ་ཐམས་ཅད་དུ། །
ཐུགས་རྗེའི་ཕྱག་གིས་ནམ་ཡང་མི་གཏོང་བར། །
མུ་མེད་སྲིད་པར་འཁྱམས་པའི་འགྲོ་བ་ལ། །
གཉེན་ཞིང་བྱམས་པ་ཁྱོད་དང་མཚུངས་གྱུར་ཅིག །

༢༣ དེ་ལྟར་བསྟོད་པའི་མུ་ཏིག་ཕྲེང་མཛེས་འདི། །
སུ་ཞིག་འཆང་དང་འཛིན་པར་བྱེད་པའམ། །
གཞན་ལ་རྒྱ་ཆེར་སྟོན་པར་བྱེད་པ་རྣམས། །
བདེ་ལེགས་དབྱར་གྱི་མཚོ་ལྟར་རྒྱས་གྱུར་ཅིག །

ཅེས་པ་འདིའང་འཕགས་མ་འོད་ཟེར་ཅན་མའི་སྟོང་མཆོད་གསར་རྩོམ་གྱི་ཆ་ལག་ཏུ་དམིགས་ནས། དཔལ་ཀརྨ་པའི་མཚན་ཙམ་འཛིན་པ། ཨོ་རྒྱན་ཕྲིན་ལས་སུ་འབོད་པ་དེས་སྤྱི་ལོ་ ༢༠༢༢ ཟླ་ ༢ ཚེས་ ༡༣ ཉིན་ཡིད་རབ་ཏུ་དང་བས་སྦྱར་བ་འདིས་ཀྱང་བཀྲ་ཤིས་ཀྱི་དགེ་མཚན་རབ་ཏུ་རྒྱས་པར་གྱུར་ཅིག་གུ།